Ciidamada Turkiga iyo Soomaaliya oo markabkii hubka siday ka soo furtay burcad-badeed
Dowladda Federaalka Soomaaliya ayaa shaacisay in ciidamada badda Turkiga, oo kaashanaya Ciidamada Xoogga Dalka Soomaaliyeed, ay gacanta burcad-badeedda ka soo furteen markabka xamuulka qaada ee M/V LUTUF, kaas oo hub iyo qalab milateri u siday xarun uu Turkigu ku leeyahay Muqdisho.
Wasaaradda Gaashaandhigga Soomaaliya ayaa sheegtay in howlgalka lagu soo furtay markabka uu socday muddo 10 maalmood ah, isla markaana lagu dilay 14 burcad-badeed ah, laguna burburiyay afar doon oo ay adeegsanayeen. Burcad-badeedda ayaa markabka afduubtay 17-kii Agoosto, xilli uu marayay biyaha ka baxsan xeebaha degmada Eyl ee gobolka Nugaal.
Wasaaradda ayaa war-saxaafadeed ku sheegtay in cadaadiska joogtada ah ee ciidamada uu ku qasbay burcad-badeedda haray inay ka baxaan markabka, kaas oo hadda dib u bilaabay safarkiisa. M/V LUTUF waa markab xamuul oo sita calanka Cameroon, waxaana iska leh shirkadda Polar Movement Shipping.
Markabka ayaa markii la afduubtay ku sii jeeday Muqdisho, isaga oo sida hub Turki ah, qalabka isgaarsiinta iyo qalab la xiriira dayax-gacmeedyada, sida uu horey wakaaladda AP ugu sheegay sarkaal Soomaali ah oo xog-ogaal u ahaa dhacdada. Sarkaalka ayaa sheegay in hubka iyo qalabka kale loo waday xarunta tababarka milateri ee TURKSOM ee Muqdisho.
Markabka waxaa saarnaa 10 shaqaale ah oo kala ahaa lix Hindi ah, hal Turki ah, hal Georgian ah iyo laba Serbian ah oo ahaa ilaalo hubeysan. Wasaaradda Gaashaandhigga ayaa sheegtay in falalka burcad-badeednimadu yihiin dambiyo culus oo ciqaab adag leh, waxayna digniin u dirtay dadka ku lugta leh, kuwa taageera iyo cid kasta oo fududeysa falalkaas.
Xigasho: Caasimada Online —
