Beeraleyda Jarran oo ku guuleystay kordhinta wax soo saarka beeraha iyagoo adeegsanaya tamarta cadceedda
Beeraleyda deegaanka Jarran ee hoostaga degmada Afgooye ayaa kordhiyay wax soo saarkooda beeraha kadib markii ay bilaabeen in waraabka beeraha ay ku shaqeeyaan tamarta cadceedda. Beeraleyda ayaa sheegay in isticmaalka tamarta cadceedda uu ka jaban yahay shidaalka, isla markaana uu u oggolaanayo in si joogto ah loo waraabiyo beeraha.
Maxamed Nuur Isxaaq oo leh beer afar hektar ah ayaa sheegay in tan iyo bishii Janaayo uu isticmaalay qalabka tamarta cadceedda, wax soo saarkiisu uu ka badan yahay labo jibaar. Wuxuu tilmaamay in hore uu ku bixin jiray $100 ilaa $150 mar kasta oo uu waraabiyo, balse hadda aysan jirin wax kharash ah oo ku baxa waraabka. Sidoo kale, Maxamed Cabdi Xasan oo muddo 15 sano ah beeraley ah ayaa sheegay in shan bilood oo uu isticmaalay qalabka tamarta cadceedda aysan wax lacag ah uga bixin waraabka, halka hore uu shidaal ku bixin jiray $300 ilaa $500 mar kasta.
Guddoomiyaha beeraleyda deegaanka Jarran ayaa sheegay in ilaa 90 beeraley ay hadda isticmaalaan qalabka tamarta cadceedda, inkastoo tirada guud ee beeraleyda deegaanka ay ka badan tahay. Beeraleyda ayaa tilmaamay in isticmaalka tamarta cadceedda uu ka caawinayo yareynta kharashaadka iyo kordhinta wax soo saarka beeraha.
Xigasho: Radio Ergo – Somali Humanitarian News and Information —
