Beesha Xawaadle oo ka hortagtay doorashada HirShabelle iyo dalbatay hakinta doorashooyinka
Beledweyne – Beesha Xawaadle ayaa si rasmi ah uga soo horjeestay doorashada la qorsheeyay in lagu qabto maamulka HirShabelle, iyaga oo dalbaday in la joojiyo doorashooyinka iyo tallaabooyinka la xiriira dhismaha maamulka cusub. Go’aankan ayaa ka soo baxay kulan maalmo ka socday magaalada Beledweyne, kaas oo ay isugu yimaadeen waxgarad iyo siyaasiyiin ka tirsan beesha.
War-murtiyeedka kasoo baxay kulanka ayaa lagu sheegay in aan la aqbali karin hannaan siyaasadeed oo laga hirgeliyo Hiiraan iyadoo aan heshiis laga gaarin, isla markaana aan la helin oggolaanshaha bulshada deegaanka. Xiirey Axmed Rooble, xoghayihii hore ee maamulka gobolka Banaadir, ayaa sheegay in beesha Xawaadle aysan taageerayn hannaan siyaasadeed oo aan ka turjumayn rabitaanka bulshada reer Hiiraan.
Beesha ayaa ku baaqday in dhismaha HirShabelle lagu saleeyo hannaan loo dhan yahay oo dhinacyada kala duwan ay ku wada qanacsan yihiin, laguna xaqiijinayo caddaalad, matalaad iyo awood-qaybsi. Waxgaradka ayaa sidoo kale ku adkeystay in tabashooyinka reer Hiiraan loo qaato si dhab ah, isla markaana xal looga gaaro wada-tashi iyo is-afgarad siyaasadeed.
Xigasho: Caasimada Online —
