Soomaaliya ma xannibin muwaadiniinta Turkiga
Ankara – Dowladda Turkiga ayaa beenisay warar baraha bulshada lagu faafiyay oo sheegaya in Soomaaliya ay xannibaad dal-ku-gal ku soo rogtay muwaadiniinta Turkiga. Qoraal ka soo baxay xarunta DMM ee la-dagaallanka wararka been-abuurka ah ee Madaxtooyada Turkiga ayaa sheegay in wararkaasi ay yihiin kuwo marin-habaabin ah.
Dowladda Turkiga ayaa caddeysay in labada dal ay weli leeyihiin heshiisyo iyo nidaamyo u oggolaanaya isu-socodka muwaadiniintooda. Waxa ay sidoo kale xaqiijisay in aan wax isbeddel ah lagu sameyn shuruudaha dal-ku-galka ee u dhexeeya Turkiga iyo Soomaaliya.
Bayaanka ayaa ugu baaqay bulshada inay ka taxaddaraan wararka aan kasoo bixin ilo rasmi ah, isla markaana ay xogta ku saabsan isu-socodka iyo shuruudaha dal-ku-galka ka raadsadaan hay’adaha dowladda ee ay khuseyso. Beenintan ayaa timid kadib markii baraha bulshada lagu faafiyay sheegashooyin la xiriiray in Soomaaliya ay diiday dal-ku-galka muwaadiniinta Turkiga.
Xigasho: Caasimada Online —
