DF oo Trump iyo dalal Carab ah kala hadleysa qorshe ku saabsan Somaliland
Dowladda Federaalka Soomaaliya ayaa dadaal diblomaasiyadeed ku kordhisay si looga hortago in dalal kale oo caalami ah ay raacaan tallaabada Israa’iil ee aqoonsiga Somaliland. Wasiiru-dowlaha Arrimaha Dibadda Soomaaliya, Cali Maxamed Cumar, ayaa sheegay in Muqdisho ay xiriir joogto ah la leedahay maamulka madaxweyne Donald Trump iyo dowladaha Carabta si arrintan looga hortago.
Cali Maxamed Cumar ayaa sheegay in Soomaaliya ay ka codsatay dowladaha Carabta inaysan ku ekaan cambaareynta go’aanka Israa’iil, balse ay adeegsadaan xiriirkooda siyaasadeed iyo saameyntooda diblomaasiyadeed si looga hortago in aqoonsiga Somaliland uu ku faafo dalal kale. Waxa uu tilmaamay in maamulka Mareykanka uu weli taageersan yahay mabda’a “hal Soomaaliya” iyo midnimada dhuleed ee dalka.
Israa’iil ayaa bishii December 2025 noqotay dalka ugu horreeya ee xubin ka ah Qaramada Midoobay ee si rasmi ah Somaliland u aqoonsada dal madax-bannaan. Dowladda Soomaaliya ayaa ku adkeysaneysa in heshiis kasta oo la xiriira dhulkeeda, amniga ama xiriirka dibadda uu u baahan yahay oggolaanshaha dowladda federaalka, iyadoo sidoo kale sii wadi doonto dadaallada diblomaasiyadeed iyo sharci si looga hortago in dalal kale ay ku daydaan go’aanka Israa’iil.
Xigasho: Caasimada Online —
