Thailand oo soo dhaweysay 5,000 oo badmaax oo Mareykan ah kadib 10 bilood oo badda ku jireen
Qiyaastii 5,000 oo badmaax iyo shaqaale ka tirsan markabka USS Abraham Lincoln ayaa yimid magaalada Pattaya ee Thailand, kadib ku dhawaad 10 bilood oo ay badda ku jireen. Shaqaalahan ayaa helay shan maalmood oo nasasho iyo madadaalo ah, iyagoo ka soo degay markabkooda oo ku xirnaa deked ku taalla waqooyiga Pattaya.
Duqa magaalada Pattaya, Poramase Ngampiches, ayaa sheegay in badmaaxiinta laga mamnuucay ciyaaraha biyaha qaarkood iyo in aysan ka faa’iidaysan sharciyada xashiishadda ee dalka. Saraakiisha amniga ayaa sidoo kale kordhiyay ilaalinta magaalada si looga hortago dhibaatooyinka inta lagu jiro fasaxa badmaaxiinta.
Markabka USS Abraham Lincoln ayaa ka baxay California bishii Nofeembar, kadibna hawlgallo ka qabtay Badda Koonfurta Shiinaha iyo Bariga Dhexe. Shaqaalaha ayaa la filayaa inay joogaan Pattaya ilaa markabka uu ka baxayo Axadda, iyadoo booqashadan ay keeni karto koror dhaqaale oo ku dhow 100 milyan oo baht.
Xigasho: Jowhar News Leader | Somali News —
