Gorfayn: Buugga Halgan iyo Hoggaan oo ka hadlaya taariikh nololeedkii Sheekh Maxamed Xaaji Yuusuf

2 September 2026 · 15:42

Buugga Halgan iyo Hoggaan ayaa la daabacay bishii Julaay 2026, wuxuuna ka kooban yahay 244 bog. Qaybta ugu badan ee buugga waxaa ku jira waraysiyo kala duwan oo laga qaaday Sheekh Maxamed Xaaji Yuusuf, kuwaas oo ay duubeen Dr Cumar Warsame iyo Sheekh Cabdullaahi Faarax Taano. Waraysiyadan ayaa laga duubay sanadihii 2001 iyo 2013, qoraaga buugguna waa wiil uu sheekhu dhalay oo la yiraahdo Cabdiraxmaan Sheekh Maxamed Xaaji Yuusuf.

Buuggu wuxuu ka warramayaa taariikh nololeedkii sheekha, isagoo diiradda saaraya halgankii iyo hoggaamintii uu qabtay. Qaybta hore ee buugga ayaa ka hadlaysa noloshiisii hore, waxbarashadiisii iyo shaqooyinkii uu qabtay ilaa burburkii dalka. Qaybta dambe ayaa ka sheekaynaysa hoggaamintii uu ka soo qabtay imaaraddii Gedo intii u dhaxaysay 1992 ilaa 1997.

Sheekhu ma ahayn culimo dhaqameed, balse wuxuu ahaa siyaasi xilal muhiim qabtay, go’aannadiisuna ay saameyn ku yeesheen deegaano badan. Buuggu wuxuu sidoo kale ka hadlayaa xaaladdii siyaasadeed iyo dhaqan ee dalka, isagoo tusaale u soo qaatay dhacdooyin iyo aragtiyo uu sheekhu ka bixiyay waayihiisa. Qoraagu wuxuu sheegay in buugga uu ku qoran yahay luqad fudud oo akhriskiisu sahlan yahay, inkastoo qeybaha dambe ee buugga ay ka muuqato buunbuunin iyo sheegashooyin aan caddeymo la socon.

Xigasho: Goobjoog —