Golaha Aqalka Sare oo u yeeray wasiirka dhallinyarada iyo ciyaaraha
Guddiga Horumarinta Adeegga Bulshada ee Aqalka Sare ayaa maanta xafiiskooda ku casuumay Wasiirka Dhallinyarada iyo Ciyaaraha, Cabdulqaadir Maxamed Cali, iyo mas’uuliyiin kale oo ka tirsan wasaaradda. Kulanka ayaa diiradda lagu saaray isla-xisaabtan iyo xog-wareysi ku saabsan hannaanka shaqo ee wasaaradda.
Xubnaha guddiga ayaa wasiirka su’aalo ka weydiiyay qorshe-hawleedka wasaaradda, horumarinta ciyaaraha dalka, dayactirka garoomada isboortiga, iyo xiriirka wasaaradda iyo dowlad-goboleedyada. Wasiirka ayaa si faahfaahsan uga jawaabay su’aalahaas, isagoo ka hadlay howlaha iyo qorshayaasha wasaaradda.
Guddoomiyaha guddiga, Senator Cismaan Maxamuud Maxamed, ayaa wasiirka uga mahadceliyay jawaabaha faahfaahsan ee uu bixiyay. Wuxuu sheegay in kulanku yahay tallaabo muhiim ah oo lagu xoojinayo isla-xisaabtanka iyo wada-shaqeynta hay’adaha dowladda iyo Baarlamaanka.
Xigasho: Caasimada Online —
