US oo sheegtay hub cusub oo hawada sare lagu rakibay
Washington – Maraykanka ayaa shaaciyey in uu hawada sare ku rakibay hub cusub, taasoo keentay su’aalo ku saabsan nooca hubkaasi iyo doorka uu ka ciyaari karo tartanka awoodaha waaweyn ee hawada sare. Wasiirka Ciidamada Cirka Troy Meink ayaa sheegay in hubkaasi uu muhiim u yahay ilaalinta ciidamada Mareykanka, balse faahfaahin kama bixin awoodiisa ama goorta la hawlgeliyey.
Khabiir ku takhasusay arrimaha milatariga ee Jaamacadda Durham, Dr Bleddyn Bowen, ayaa sheegay in hubkaasi laga yaabo inuu yahay qalab lagu farageliyo isgaarsiinta dayax-gacmeedyada, oo aan burburin. Waxa kale oo uu sheegay in suurtogal tahay in hubkaasi uu yahay mid awood u leh inuu burburiyo dayax-gacmeedyada, ama qalab u dhow dayax-gacmeedyada oo baaritaan iyo qabasho sameeya.
Dhinaca kale, khubarada ayaa tilmaamay in Ruushka iyo Shiinaha ay horey u sameeyeen tijaabooyin hub hawada sare ah, oo ay ku jiraan hubka lagu weeraro dayax-gacmeedyada iyo qalabka u dhow dayax-gacmeedyada. Waxaana la sheegay in hubka noocan oo kale ah uu keeni karo qashinka hawada sare, taasoo halis ku ah dayax-gacmeedyada kale.
Xigasho: Hiiraan Online – Somali News —
