DF oo maamulka Trump iyo dalal Carab ah kala hadleysa qorshe ku saabsan Somaliland
Dowladda Federaalka Soomaaliya ayaa dadaal diblomaasiyadeed oo dheeraad ah ku billaabatay si looga hortago in dalal kale ay ku daydaan Israa’iil oo Somaliland u aqoonsatay dal madax-bannaan. Wasiiru-dowlaha Arrimaha Dibadda Soomaaliya, Cali Maxamed Cumar, ayaa sheegay in Muqdisho ay xiriir joogto ah la leedahay maamulka Mareykanka iyo dowladaha Carabta si arrintan looga hortago.
Cali Maxamed Cumar ayaa sheegay in Soomaaliya ay dalbatay in dowladaha Carabta aysan ku ekaan cambaareynta tallaabada Israa’iil, balse ay adeegsadaan saameyntooda siyaasadeed si looga hortago in aqoonsiga Somaliland uu ku fido dalal kale. Waxa uu xusay in Mareykanka uu weli taageersan yahay mabda’a hal Soomaaliya, inkastoo qaar ka mid ah xubnaha Kongareeska ay doonayaan in Washington ay beddesho mowqifka.
Israa’iil ayaa bishii December 2025 noqotay dalkii ugu horreeyay ee xubin ka ah Qaramada Midoobay ee si rasmi ah Somaliland ugu aqoonsada dal madax-bannaan. Dowladda Soomaaliya ayaa ku adkeysaneysa in heshiis kasta oo la xiriira dhulkeeda iyo amniga uu u baahan yahay oggolaansho ka yimaada dowladda federaalka, iyadoo sii wadi doonta dadaallada diblomaasiyadeed iyo sharci si looga hortago in dalal kale ay ku daydaan go’aanka Israa’iil.
Xigasho: Caasimada Online —
