UNICEF: 20 Milyan oo Caruur ah ayaa la kulmay xadgudub galmo oo internetka ah sanadkii la soo dhaafay

4 September 2026 · 03:40

UNICEF ayaa shaacisay in ku dhawaad 20 milyan oo caruur ah oo isticmaala internetka 21 dal ay la kulmeen xadgudub galmo ama ka faa’iidaysi galmo oo ka dhacay baraha dijitaalka sanad gudaheed. Warbixinta ayaa sheegtay in in ka badan hal meelood shan caruurta da’doodu u dhaxayso 12 ilaa 17 ay soo sheegeen inay la kulmeen ugu yaraan hal nooc oo xadgudub galmo ah oo internetka ah.

UNICEF ayaa tilmaantay in ku dhawaad 15 milyan oo caruur ah ay arkeen waxyaabo galmo oo aan la rabin, 9 milyan ayaa lagu qasbay inay galaan wada sheekaysi galmo ama sawirro galmo la wadaagaan, halka 4 milyan ay sheegeen in sawirro galmo oo iyaga ka mid ah la faafiyay iyaga oo aan oggolaan. Baraha bulshada ayaa lagu sheegay inay yihiin meesha ugu badan ee xadgudubyada ka dhacaan, iyadoo Facebook, WhatsApp, Instagram, Snapchat iyo TikTok ay yihiin kuwa ugu badan.

UNICEF ayaa ku baaqday in dowladaha iyo shirkadaha tiknoolajiyada ay xoojiyaan tallaabooyinka amniga ee internetka, cusbooneysiiyaan sharciyada si ay ula jaanqaadaan noocyada cusub ee xadgudubyada, gaar ahaan kuwa la xiriira sawirrada iyo muuqaallada AI-ga, isla markaana ay xoojiyaan adeegyada ilaalinta caruurta iyo nidaamyada warbixinta.

Xigasho: Jowhar News Leader | Somali News —