Jaamac oo ka hadlay halista burcad-badeedda ee xeebaha Soomaaliya
Muqdisho – Guddoomiyaha Golaha Shacabka Soomaaliya, Cabdulqaadir Maxamed Nuur (Jaamac), ayaa maanta khudbad ka jeediyay Baarlamaanka isagoo ka digay halista burcad-badeedda ee kusoo laabatay xeebaha dalka. Jaamac ayaa sheegay in burcadbadeednimadu ay saameyn weyn ku leedahay amniga, dhaqaalaha, bulshooyinka xeebaha, iyo ganacsiga caalamiga ah.
Guddoomiyuhu wuxuu xusay in Baarlamaanka uu ka go’an yahay xoojinta sharciyada lagama maarmaanka u ah la-dagaallanka burcadbadeednimada iyo afduubka, isagoo tilmaamay in dhowr sharci oo muhiim ah la ansixiyay sanadihii la soo dhaafay. Jaamac ayaa sidoo kale ku baaqay in la xoojiyo dhaqan-gelinta shuruucda, hay’adaha ammaanka, iyo iskaashiga caalamiga ah si loo sugo amniga badaha Soomaaliya.
Jaamac ayaa intaa ku daray in burcadbadeednimadu aysan ahayn dhibaato qaran oo keliya, balse ay saameyn ku leedahay xasilloonida gobolka iyo dhaqaalaha adduunka. Wuxuu sheegay in la-dagaallanka burcadbadeednimada uu yahay qayb ka mid ah dib-u-dhiska dowladnimada iyo ilaalinta khayraadka dabiiciga ah ee dalka.
Xigasho: Caasimada Online —
