WMO oo digniin ka bixisay in El Niño uu sababi karo cimilada daran caalamka

3 September 2026 · 11:29

Hay’adda Cimilada Adduunka ee WMO ayaa sheegtay in El Niño oo ah dhacdo cimilada ah oo xooggan uu haatan ka socdo badweynta Baasifigga, islamarkaana uu noqon doono mid aad u xoog badan bilaha soo socda. WMO ayaa ku tilmaantay in kororka heerkulka badda Baasifigga uu si weyn u beddeli karo cimilada adduunka, taasoo kordhin karta fatahaadaha, abaaraha iyo kulaylka daran.

WMO ayaa sheegtay in heerkulka dhulka intiisa badan uu ka sarreyn doono heerka caadiga ah, iyadoo saadaasha ay muujinayso in El Niño uu sii jiri doono ilaa Febraayo 2027. Tani waa markii ugu horreysay ee WMO ay si cad u sheegto in dhacdadan cimilada ay noqon doonto mid aad u xoog badan. Professor Adam Scaife oo ka tirsan Xafiiska Saadaasha Cimilada ee UK ayaa sheegay in El Niño uu noqon karo kii ugu weynaa ee la xasuusto, isla markaana 2027 uu u badan yahay inuu noqdo sannadkii ugu kululaa taariikhda.

WMO ayaa sidoo kale sheegtay in kulaylka badda Baasifigga uu gaaray heer aad u sarreeya, iyadoo heerkulka dusha badda uu ka sarreeyo 2.6°C heerka caadiga ah, halka heerkulka hoos yimaada badda uu ka badan yahay 8°C. Hay’adda ayaa bilowday olole digniin iyo diyaar garow caalami ah oo ay la kaashanayso hay’adaha qaran iyo kuwa qaramada midoobay si looga hortago saameynta ay cimilada daran ku yeelan karto beeraha, biyaha, caafimaadka iyo tamarta.

Xigasho: Jowhar News Leader | Somali News —